ცემენტის ხარისხის ფარული ტესტირების პირველი შედეგები
საქართველოს ცემენტის ასოციაციამ (GCA), რომლის ერთ-ერთი დამფუძნებელი წევრი კომპანია GBG გახლავთ, ქართულ ბაზარზე არსებული შეფუთული ცემენტის ფარული ტესტირების პირველი შედეგები წარადგინა. აღნიშნული ინიციატივა სამშენებლო სექტორში ხარისხის კონტროლის გამკაცრებასა და ევროპული სტანდარტების დანერგვას ემსახურება.
პროცესის სრული ობიექტურობის უზრუნველსაყოფად, კვლევა დამოუკიდებელი ორგანოს, შპს „საქექსპერტიზის“ ზედამხედველობით წარიმართა. სავაჭრო ქსელში ფარულად შესყიდულ იქნა სხვადასხვა მწარმოებლის 25 ტომარა ცემენტი, რომელთა ნიმუშები დაილუქა და მიენიჭა სპეციალური კოდები, რათა შემმოწმებლებს პროდუქციის წარმომავლობაზე ინფორმაცია არ ჰქონოდათ.
კოდირებული სატესტო სინჯები შესამოწმებლად გაიგზავნა საქართველოს ტექნიკური უნივერსიტეტის სამშენებლო ფაკულტეტის საექსპერტო ლაბორატორიაში. პარალელური ტესტირების მიზნით, ნიმუშების იდენტური კომპლექტები GCA-ს წევრი კომპანიების, მათ შორის GBG-ის, აკრედიტებულ ლაბორატორიებშიც შემოწმდა.
ლაბორატორიული კვლევის შედეგებმა აჩვენა, რომ 25 ნიმუშიდან ევროპული EN სტანდარტის მოთხოვნები მხოლოდ 8 პროდუქტმა დააკმაყოფილა. მნიშვნელოვანია, რომ ამ 8 სტანდარტული ნიმუშიდან 6 უშუალოდ ასოციაციის წევრთა წარმოებული ცემენტი აღმოჩნდა. 14-მა ადგილობრივმა და რამდენიმე იმპორტულმა ნაწარმმა ტესტირება ვერ გაიარა და მათში სიმტკიცის ყველაზე მაღალი მაჩვენებელი მხოლოდ 18.35 მპა დაფიქსირდა.
ასოციაციის უმთავრეს მიზანს მომხმარებელთა უფლებების დაცვა და სამშენებლო უსაფრთხოების უზრუნველყოფა წარმოადგენს. GCA აქტიურად მუშაობს იმისათვის, რომ აღკვეთოს ბაზარზე ისეთი პროდუქციის რეალიზაცია, რომლის რეალური მახასიათებლები არ შეესაბამება შეფუთვაზე დატანილ ინფორმაციას.
ამ გამოწვევის საპასუხოდ, GCA ნერგავს ხარისხის სპეციალურ ნიშანს, რომელიც საიმედოობისა და ევროპული სტანდარტის გარანტი იქნება. აღნიშნული ნიშნის შეფუთვაზე დატანის უფლებას მოიპოვებენ მხოლოდ ის მწარმოებლები, რომლებიც რეგულარულ, მკაცრ ლაბორატორიულ შემოწმებას გაივლიან და დაადასტურებენ პროდუქციის უკომპრომისო ხარისხს.
GBG-ის, როგორც ასოციაციის დამფუძნებლის, საბოლოო მიზანია საქართველოში კონკურენტუნარიანი და ეკონომიკურად მდგრადი ცემენტის ინდუსტრიის ჩამოყალიბება. ადგილობრივი წარმოების გაძლიერება უზრუნველყოფს ქვეყნის დამოუკიდებლობას დაბალხარისხიანი იმპორტისგან, ქმნის ახალ სამუშაო ადგილებს და ინარჩუნებს პროფესიულ გამოცდილებას ქვეყნის შიგნით.